Umabot iti 1.5 milyon a freelancer ken virtual assistant ti eligible a makarehistro kas self-employed a miembro ti Social Security System (SSS) iti babaen ti baro a katulagan iti nagbaetan ti Social Security System ken ti Department of Information and Communications Technology (DICT).
Segun ken ni SSS President ken Chief Executive Officer Victor Alfonso Limlingan, napateg ti trabaho dagiti freelancer ken virtual assistants.
Maipalagip nga idi Oktubre 21 ket nagpirma ti memorandum of understanding dagiti opisyal ti Social Security System ken Department of Information and Communications Technology tapno palawaen ti social security protection dagiti online workers iti pagilian.
Iti babaen ti katulagan, dagiti self-employed members ket eligible para iti sickness, maternity, disability, retirement, funeral, ken death benefits.
Mabalin da pay nga agaplikar iti loan programs ti SSS a pakairamanan ti salary loans, Emergency Loan Program, ken SSS Micro Loan Program.
Para met kadagiti self-employed members, ti kababaan a monthly contribution ket P760 idinto a ti kangatoan ket P5,280.
