Nagtalinaed a kritikal ti driver ti maysa a kurung-kurong gapu iti sinagaba na a sugat iti ulo na kalpasan a natukbob na ti sarsarunwen na nga electric bike iti paset ti Brgy. 23, San Matias ditoy ciudad ti Laoag.
Segun ken ni Police Staff Sergeant Alexon Rosal iti Philippine National Police – Traffic Division ditoy ciudad, ti driver ti kurung-kurung ket agtawen ti 44, aluminum installer, residente iti Brgy. 53, Rioeng ditoy ciudad idinto a ti nangiturong ti e-bike ket maysa a menor de edad ken adda ti lubbon na nga agtawen ti 45, parlor helper, ken residente ti Brgy. 26 ditoy metlaeng siudad ti Laoag.
Inbatad na nga iti imbestigasyon da, kabayatan ti panagpadpadaya ti dua a lugan ket kellaat a natukbob ti kurung-kurung ti likudan ti sarsarunwen na nga e-bike.
Gapu iti daytoy, natennag ti driver ti kurung-kurung a nangitunda ti panagsagaba na ti sugat iti nagduduma a paset ti bagina ken naitupar pay ti ulo na idinto a saan met a nadangran dagiti nakalugan iti e-bike.
Naitaray ti biktima iti Governor Roque Ablan Senior Memorial Hospital ditoy ciudad ti Laoag para iti naan-anay a pannakataming na.
Rumrumuar a napataray ti driver ti kurung-kurung idi napasamak ti insidente, ngem saan pay a masinunuo no daytoy ket nakainom ti arak wenno saan.
Agpapan ita ket nagtalinaed paylaeng iti ospital gapu kadagiti nakana a sugat a sinagaba na aglalo iti ulo na.
