LAOAG CITY – Binalakadan ti Provincial Veterinary Office dagiti agtartaraken ti dingwen nangruna ita a nabara ti panawen gapu iti El Niño.
Segun ken ni Dr. Loida Valenzuela, mangidadaulo ti Provincial Veterinary Office, masapol nga adda ti nakaanta a danom nga inumen dagiti taraken.
Inbatadna a no mabalin ket saan nga agusar ti plastic a pagpainoman kadagiti taraken gaputa no ma-expose dagitoy iti init ket adda ti chemical reaction-na daytoy ket posible nga adda ti epektona iti salun-at dagiti dingwen.
Inlawlawagna nga imbes a plastic ket napinpintas nga stainless laengen ti usaren a pagpainuman kadagiti taraken gaputa iti daytoy ket lumamiis pay ti danum.
Kabayatanna, kinuna ni Dr. Valenzuela nga iti agdama ket awan met ti nai-report a natay a dingwen gapu iti heat stroke wenno gapu iti napudot a panawen.
Mangnamnama daytoy a saan met unay a dakkel ti epekto ti nabara a panawen ditoy probinsia kangrunaanna kadagiti taraken.
