LAOAG CITY – Binalakadan ni Vice Mayor Rey Carlos Fariñas dagiti 18 nga umili a nakaala ti franchise-na a sumurot kadagiti pagalagadan mainaig ti panagusar dagiti tricycle dagitoy.
Impettengna a kasapolan a sumurot dagiti akin kukua ti tricycle iti amin a klase ti paglintegan kangrunaan iti husto a pannakausar ti franchise-da.
Inlawlawagna a saan a rumbeng a mailako dagiti franchise gapu ta no maduktalanda nga adda kasoy nga aramid ket dagos nga ibabawida ti nasao a franchise.
Mainaig iti daytoy, kunana a nasayaat no mausar ti franchise iti inaldaw a panagpasadada tapno mangtulong a mangalay-ay iti pamiliada.
Immunan iti daytoy ti inaprobaran ti konseho iti maikatlo ken maudi a pannakaibasana ti Draft City Ordinance ti pannakaiyakar wenno transfer ti Motorized Tricycle for – Hire a sakupen ti territorial jurisdiction ti nagduduma a barangay ditoy suidad.
Naamoan a naipasa iti ordinansa babaen ti 12 a botos manipud kadagiti konseho ditoy suidad ti Laoag.
