LAOAG CITY – Napasamak iti maysa a vehicular traffic incident iti paset ti Palpalicong Road iti siudad ti Batac no sadinno a nagdinnungpar ti maysa a kurung-kurong ken motorsiklo.
Ti nangiturong iti kurung-kurong a maysa a lalaki ket agtawen ti 43, idinto a dagiti pasahero na ket maysa a menor de edad ken maysa a lakay a residente iti Brgy. Baay iti siudad ti Batac.
Nabigbig met ti driver ti motorsiklo a maysa a lalaki nga agtawen 34, ken residente iti Brgy. Maypalig iti metlang nadakamat a siudad.
Segun ken ni PMaj. Alice Vicente, deputy chief of police iti siudad ti Batac, kabayatan ti panagpapaamyanan ti kurung-kurung ket nag-overtake ti agpapa-abagatan met a motorsiklo a nangitunda ti panagdinnungpar da.
Gapu iti napasamak ket nagsagaba ti sugat iti nagduduma a paset ti bagi dagiti biktima, ken naitaray da a dagus iti ospital para iti naan-anay a pannakataming da.
