Personal nga indanon iti Department of Social Welfare and Development Office Region 1, pakairamanan ti City Social Welfare and Development Office ditoy siudad ti Laoag, ti tulong kadagiti biktima iti napasamak nga uram iti Barangay 46 Nalbo ditoy siudad iti kallabes.
Maipalagip a nauram ti uppat a pagtaengan ken naapektaran ti innem a pamilia wenno 12 nga indibidual idi Oktubre 30, 2026.
Insigida a naipaayan iti kangrunaan a tulong dagiti biktima nga aggapu iti gobierno siudad ken babaen iti koorsinasyon iti Department of Social Welfare and Development ket adda manen iti manamnama a sumarsaruno pay a sumangpet a tulong.
Segun ken ni Mrs. Perlita Cabello, mangidadaulo ti City Social Welfare and Development Office ditoy siudad ti Laoag, a dagiti naipaay a tulong ket food packs, ready-to-eat foods, sleeping kits, hygiene kits, kitchen kits ken family kits.
Inpasingked ni Cabello ti agtultuloy a tulong kadagiti naapektaran para iti in-inot a panagbangon babaen ti panagtitinnulong dagiti ahensia iti gobierno ken indibidual.
Maipalagip nga immunan nga inpakaammo ti Bureau of Fire Protection nga umaboten iti nasurok P2 million iti mapatta-patta a balor dagiti nadadael iti uram basar iti insumitir a dokumento dagiti maseknan.
