LAOAG CITY – Inpakaammo ni Fire Inspector Edison Reyes ti Fire Marshal ditoy siudad ti Laoag nga umabot iti 14 a behikulo ti pakabukelan a nauram iti maysa a garahe iti Brgy 2 ditoy siudad ti Laoag.

Kinunana nga iti agdama ket saanda pay a masinunuo ti pakabukelan a balor dagiti nauram gaputa saan pay a nakaisubmitir ti report dagiti akinkukua kadagiti nauram a behikulo.

Inbatadna a dagiti 14 a nauram a behikulo ket pakairamanan ti 7 a tricycle, 4 a kurong-kurong, 2 a motor ken maysa nga e-bike.

Malaksid iti daytoy, kinunana nga iti agdama ket saan pay a masinunuo ti rason ti uram ngem ti maysa a patienda ket gapu iti kuryente.
Maipalagip nga iti kallabes ket adda ti napasamak nga uram iti garahe dagiti ag-live-in partner, no sadinno ginandatda nga isalakan dagiti luganda ngem ngem ditoy a naalada ti sinagbada a first-degree burn iti nagduduma a paset ti bagida.