Naiget nga im-imbestigaren ti National Bureau of Investigation (NBI) ti report manipod iti U.S. Federal Bureau of Investigation (FBI) mainaig iti kaadda ti maipagarop a tallo a menor de edad a nagplano a mangiyuswat ti mass shooting iti pagadalan iti siudad ti Batac.
Rumrumuar a ti main subject ket agtawen ti 16 ngem saanen nga inpublikar dagiti otoridad para iti pannakaprotehir da aglalo ket agpapada dagitoy a menor de edad.
Basar iti National Bureau of Investigation, ti kangrunaan a subject ket maipagarop a mabulbully, no sadinno a dagiti mensahe dagiti menor de edad iti group chat da iti instagram ket makita dagiti ladawan ti paltog ken nadakamat da pay ti sarita a mass shooting.
Adda pay ti mensahe ti main subject a kayat na ti matayen ngem masapol nga adda dagiti kadwa na.
Nupay kasta, inkalintegan dagiti dua a menor de edad a dagiti inpatulod da a ladawan ket naadaw manipod iti Artificial Intelligence (AI) idinto a ti bagi ti main subject ket airgun a nai-convert iti caliber 22.
Iti agdama, nagtalinaed latta dagiti tallo a menor de edad iti pagtaengan da ngem inkari dagiti nagannak da a monitoren da a naimbag dagitoy.
Mainaig iti daytoy, nangiparuk-at metten ti Philippine National Police ti statement da mainaig iti nasao a pasamak.
Inrakurak ti nailian a pulisya a ti kangrunaan a prayoridad da ket ti kinatalged dagiti estudyante, mangisursuro, nagannak, ken ti sibubukel a komunidad.












