Kwinestionaran ni Senator-Judge Kiko Pangilinan iti maika-44 nga aldaw ti impeachment trial ni Vice President Sara Duterte ti defense witness a ni dati nga Anti-Money Laundering Council (AMLC) official Atty. Rainer Dela Fuente mainaig iti relasion na ken ni Atty. Edward Gialogo, a dati a law firm partner-na.

Kinumpirmaran ni Dela Fuente a nagbalin nga agkasosyo da ken ni Gialogo manipud 2018 agingga 2021 ken nabayagen nga agamammo ken agpagayam dagitoy manipud kolehio.

Sinaludsod ni Pangilinan ti testigo no ammo na a nagbalin nga abogado ti Duterte Youth Party-list ni Gialogo ngem inbatad ni Dela Fuente nga awanan daytoy ti personal a pannakaammo na mainaig iti daytoy.

Nupay kasta, posible a nakapukos iti election practice ti tay-ak ti abogasia ni Gialogo.

Malaksid iti daytoy, sinaludsod ni Pangilinan ti maipagarup a panagsuporta ni Gialogo iti kampania ni dati a Presidente Rodrigo Duterte iti 2016 ngem insungbat ni Dela Fuente nga awan ammo na mainaig iti daytoy gapu ta saan da agsarsarita.

Kabayatana, idi sinaludsod no siasinno ti inbotos na idi 2016 National Elections, inrakurak ni Dela Fuente a saan na a malagip no nakabotos daytoy idi kadayta a panawen