Maalarma dagiti sumagmamano a mangisursuro iti Mariano Marcos State University (MMSU) kalpasan nga adda ti kellaat a pannakaipababa ti posision da.
Segun iti maysa a concerned citizen a saanen a nagpabigbig pay, dagiti contractual nga empleado ket napagbalin a contract of service.
Inbatad na a daytoy ket napasamak sumagmamano nga aldaw sakbay iti pannakapabaro dagiti kontrata da.
Mainaig iti daytoy, inlawlawag ni Dr. Julius Manzano, Presidente ti nadakamat nga unibersidad, a daytoy ket nagresultaan iti kinaawan ti pondo nga inpaay ti Department of Budget and Management kadagiti contractual faculty.
Kunana a ti inaramid da ket wagas a panangiyurnos laeng ti administration tapno maakomodar dagitoy a mangisursuro.
Innayon na nga ibilang na kas maysa a band aid solution iti sumaruno a semester.
Inlawlawag na a no pagtalinaeden da ti agdama a posision dagiti sumagmamano a contractual employee ket saan da a kabaelan nga ipaay ti sweldo da.
Nupay kasta, kunana a nailawlawag daytoyen a banag kadagiti naapektaran.
Segun ken ni Dr. Manzano, araramiden da dagiti wagas tapno makissayan ti bilang dagiti contractual faculty iti sumarsasuno a dua a tawen babaen iti pananglitop dagiti nagduduma a posision.
Naamoan a maysa kadagiti kangrunaan a kasapulan tapno maipermanente ket rumbeng nga addaan da ti master’s degree.
Inadmitir pay ti University President a saan da koma a kayat a mapasamak daytoy ken narigat a desision daytoy nga inaramid da ngem awan ti sabali pay nga option nga mabalin da nga aramiden.
Inlungalong na a mabalin nga agsurat dagiti concerned faculty iti Department of Budget and Management pakaseknan iti daytoy nga isyu gapu ta patien na a naaramiden ti management ti Mariano Marcos State University ti ammo na a wagas.












