LAOAG CITY – Tinakawan ti dua a pump attendant ti maysa a gasoline station iti Barangay 3, ditoy siudad ti Laoag.

Ti maysa a suspek ket maysa a babai nga agtawen ti 47 ken idinto a ti maysa ket lalaki agtawen ti 21, agpada a pump attendant.

Segun ken ni P/Maj. Antonio Marzan Jr., ti Ilocos Norte Police Provincial Office (INPPO), nagturong ti maysa a babai, agtawen 58, naasawaan, ken businesswoman iti Laoag City Police Station tapno i-report ti maipagarop a pannakatakaw ti balor 7,500 pesos.

Namunganay daytoy apaman a maipagarop nga imbilin ti suspek a babai ti lalaki a kadwana nga alaen ti kuarta manipod iti cashier tapno ited kenkuana nga awan ti pammalubos ti station manager wenno owner.

Idinto nga agi-remit da iti naglakoan, naobserbaran ti station manager a saan nga agsusurot wenno kurang ti gatad a nai-remit.

Gapu iti daytoy, kinomprontar ti manager ti suspek a lalaki mainaig iti panagkurang ti kuarta.

Kabayatan daytoy, inadmitir ti suspek nga innalana ti kuarta ken inyawat na daytoy iti babai a kadwana.

Gapu iti daytoy, kalikagom akin kukua ti gasolina station a maipasubli ti natakaw a kuarta ngem saandan a kabalinan nga isubli pay.

Iti agdama, addan dagiti suspek iti kustodiar ti Laoag City police station para iti pannakadokumento na ken ti pannakaisagsagana ti maipila a kaso kontra kadagiti suspek.