LAOAG CITY – Inbatad ni Doctor Loida Valenzuela, ti Provincial Veterinarian ditoy probinsya nga umaboten iti 502 a baboy ti natay ken naikali iti Barangay Maan-anteng iti ili ti Solsona.
Daytoy ket gapu ta apektado dagitoy kadagiti baboy a nagpositibo iti African Swine Fever (ASF).
Inbaga ni Valenzuela a malaksid iti Barangay Maan-anteng ket adda metten ti naikali a 284 a baboy iti Barangay Catangraran idinto a 28 iti Barangay Manalpac iti ili ti Solsona.
Segun ken ni Valenzuela, kadagupan kadagiti 502 a baboy a naikali iti Barangay Maan-anteng ket adda ti nasurok a 20 a nagpositibo ti ASF.
Kabayatanna, inbalakad ni Valenzuela a saan koma nga agala ti danom iti irigasyon a pagpadigus, pagpainom, ken pagdanom kadagiti ipakan kadagiti dingwen kadagiti nadakamat a barangay.
Inaramid daytoy ni Valenzuela kalpasan na naduktalan da nga adda ti maysa a mannalon iti Barangay Maan-anteng a nagipaanud kadagiti natay a buryas ken ti pangganakan iti irigasyon.
