LAOAG CITY – Nakasagana ti Armed Forces of the Philippines (AFP) nga ibuwis ti biagda tapno depensaan ti teritoryo ti pagilian karaman ti sakopen ti exclusive economic zone (EEZ) ken Kalayaan Island Group (KIG).
Nagtalinaed ti takder ni Navy spokesperson for the West Philippine Sea Rear Admiral Roy Vincent Trinidad a nagsapata da tapno protehiran ti pagilian manipod iti amin a pangta, iti man lokal wenno gangannaet.
Saan metten a dinakamat ti Navy official no kaano a mabalin nga usaren ti armada ti pagpatinggaan ti sakripisyo da, no sadinno a mangnamnama da nga annungen da ti mandato da aniaman ti kasukat daytoy.
Daytoy ket iti baet ti rakurak ti sumagmamano nga opisyal ti Pilipinas aglalo ken ni Senador Rodante Marcoleta nga addan iti ruwar ti exclusive economic zone ti pagilian ti Kalayaan Island Group.
Iti biang ti Armed Forces of the Philippines, inbatad ni Rear Admiral Trinidad a nalawag ti mandato da ken nailanad iti Konstitusyon ti limitasyon ti teritoryo ti Pilipinas.
Innayon na a mandato a protektaran da ti national sovereignty tapno masigurado ti integridad ti teritoryo ti pagilyan agingga iti 200 nautical miles Exclusive Economic Zone ken ti regime of islands a sakopen ti Kalayaan Island Group a labesen ti Exclusive Economic Zone ken panangsalwad ti pagsayaatan dagiti Pilipino.
