LAOAG CITY – Nangiyuswat ti information dissemination ti Armed Forces of the Philippines ken US Armed Forces kadagiti opisyal ti Metro La Paz ken coastal barangays, Philippine National Police, Department of Environment and Natural Resources, City Disaster Risk Reduction and Management Council, Department of Public Safety, Bureau of Fire Protection ken nagduduma pay nga ahensia ken grupo, iti pannakaiwayat ti Balikatan Exercises iti coastal areas ti iti Metro La Paz ken Barangay Talingaan ditoy ciudad ti Laoag.
Daytoy ti inpakaammo ni Dr. Melvin Manuel, ti mangidadaulo iti City Disaster Risk Reduction and Management Council ditoy ciudad ti Laoag.
Kuna na a naipatungpal ti information dissemination tapno saan ton a makigtot dagiti tattao iti pannakaiwayat ti Balikatan Exercises kadagiti nadakamat a lugar ken tapno saanda nga agbalaw no adda dagiti makita da a soldado nga Amerikano ken uray kadagiti kameng ti Philippine Army, kasta pay dagiti agsangpet a nagduduma ti klase na a lugan a pakigubat.
Innayon na a malaksid kadagiti soldado ti Amerika ken Pilipinas ket adda pay dagiti aggapo iti Japan ken Europe a dagitoy ket mapatta-patta nga umabot ti sumurok-kumurang a sangaribo.
Gagem ti Balikatan Exercises iti panagtitinnulong dagiti nagduduma a nasyon no kasapulan, ken kasta metten ti kapabilidad iti tunggal maysa.
Inpakaammo ni Manuel a kaadoan kadagiti maiwayat nga aktibidad ket water exercise ngem dagitoy ket minimal laeng ken saan a makadadael iti aglawlaw.
Inbatad na a narugyan paylaeng iti umuna a paset ti Abril ti exercise ngem ti pannakaiwayat ti full blast a balikatan ket intono Mayo 4 ita a tawen.
