LAOAG CITY – Umabot iti 3,214 a balay ti nadadael iti iduduprak ti bagyo Nika ken Ofel iti pagilian.
Daytoy ti inbatad ti National Disaster Risk Reduction and Management Council (NDRRMC).
Basar iti National Disaster Risk Reduction and Management Council, manipod iti nasao a bilang ket 2,922 a balay ti partially damaged idinto a 292 ti totally damaged iti Ilocos Region, Cagayan Valley, Central Luzon ken iti Cordillera Administrative Region (CAR).
Kaadoan kadagiti nairekord a nadadael a balay ket manipod iti Cagayan Valley nga umabot iti 2,739.
Adda metten ti 419,923 nga indibidual wenno 109,263 a pamilya iti Ilocos Region, Cagayan Valley, Central Luzon, Bicol Region, ken iti Cordillera Administrative Region ti naapektaran iti Bagyo Ofel ken Nika.
Iti agdama, addan ti P23,062,167 a balor dagiti naibunong a tulong para kadagiti biktima ti kalamidad.
