LAOAG CITY – Rimmaot dagiti maipagarop a Boko Haram Islamist militants iti estado ti Yobe iti daya a paset ti Nigeria a nakatayan ti 37 a tattao.
Inbatad dagiti residente iti lugar a possible a manayunan pay ti bilang dagiti natay kalpasan nga adda ti sumagmamano a mapukpukaw.
Ti Yobe ket maysa kadagiti tallo nga estado a kangrunaan a pangop-operaran ti Boko Haram iti uneg ti 15 a tawen.
Mamati ni Yobe police spokesperson Dungus Abdulkarim a ti napasamak a panagatake iti Yobe’s Mafa village ket paset ti panagibales kalpasan ti pannakatay ti dua a maipagarop a Boko Haram fighters babaen kadagiti residente iti nadakamat a lugar.
