LAOAG CITY – Narekobre dagiti Discaya ti ledgers wenno records dagiti financial transactions ti sumagmamano a kongresista ken dati nga opisial nga innaganan ken itudtudoda iti maanomalya a flood control projects.
Napalubosan a makaruar iti pagbaludan iti Senado ni Curlee Discaya kaduana ti asawana a ni Sarah tapno biruken ti ledger wenno dagiti dokumento a naglaon ti records dagiti nagbalin a panangitedda ti komision manipud kadagiti government projects.
Nupay kasta, saan pay amin a ledger ket iggemen dagiti Discaya.
Inbatad ni Curlee, dagiti naalada a ledger ket records dagiti intedda a komision kada Pasig Cong. Roman Romulo, QC District 4 Cong. Marvin Rillo, Caloocan Cong. Dean Asistio, QC District 5 Cong. Patrick Vargas, QC District 6 Cong. Marivic Pilar, USWAG Ilonggo Cong. Jojo Ang, dati a Presidential Assistant for the Visayas (OPAV) Usec. Terence Calatrava ken dati a Department of Public Works and Highways Usec. Roberto Bernardo.
Kabayatanna, iti baet ti panangidetalye dagiti Discaya kadagiti nagbalin a transaksion, pinakumpirmar ni Senador Sherwin Gatchalian ken ni Bernardo nga adda iti panagdengngeg met no agibagbaga ti pudno ni Curlee.
Basar iti records, kuna ni Curlee a nangitedda ti komision ken ni Bernardo iti babaen ni South Manila District Engineer Manny Bulusan.
Kinumpirmaran ni Bernardo nga adda ti ipapaay a kuarta kenkuana ni Bulusan ngem i-match-na pay laeng nga umuna daytoy iti listaanna ken saanna met a naglibakan nga adda ti maaw-awatna kadagiti Discaya.
Naobserbaran ni Gatchalian idi nasaludsod dagiti Discaya a sumagmamano kadagiti innagananda nga immawat ti kickback ket saan met a direkta nga inikkan daytoy no diket adda ti umaw-awat para kadakuada.
