LAOAG CITY – Maysa a naisangsangayan a world record ti nagun-od kalpasan a nabigbig ni Shitsui Hakoishi, maysa nga agtawen ti 108 a lola kas “Oldest Female Barber” iti intero a lubong basar iti LongeviQuest at Guinness World Record.
Iti uneg ti bassit a barbershop daytoy iti Tochigi Prefecture, agtultuloy latta ni Hakoishi nga agig-iggem ti kartib nga inusarna sipod pay sakbay a nangrugi ti World War II.
Naipasngay isuna idi Nobiembre 10, 1916, manipud iti maysa a pamilia dagiti mannalon, nasapa a nagbalin a barbero ni Hakoishi.
Iti tawenna a 14, nagdesision isuna nga agbalin nga apprentice iti maysa a salon idiay Tokyo.
Idi agtawen ti 18, nakapasa isuna iti eksaminasion tapno agbalin a naan-anay a barbero ken nagbalin a nalatak kadagiti nagtrabahoanna.
Nagkasar isuna iti asawana a ni Jiro iti tawenna a 24 ken nangipasdek ti bukud a barbershop.
Nupay kasta, saan a nagbayag ket inpatulodda ti misterna iti gubat ken saanen a nakasubli pay.
Iti kangitingitan ti panagbomba ti Estados Unidos idiay Tokyo, nauram ti pagtaenganda pakairamanan ti barber shop-da ngem nagasat a nakalasatda kalpasan a nagibakwit nga agsubli idiay Tochigi.
