LAOAG CITY – Pimmusay ti agtawen ti tallo nga ubing kalpasan ti pannakalmes na iti irigasyon iti Barangay Malasin iti ili ti Bangui.
Segun kenni Police Major Julius Basallo, ti chief of police ti PNP-Bangui, adda ti naawat da nga insidente ti pannakalmes isut gapo na a dagus da a nagturong iti nasao a lugar.
Kunana nga idi adda da iti lugar ket nakita da ti ama ti ubing a sumirsirok iti bassit a rangtay ti irigasyon isut gapo na a dagus da met a timmulong da pakairamanan ti BFP ken barangay officials a nagbirok.
Inlawlawag na a nakita da ti ubing kalpasan ti maysa nga oras a panagbirok da iti paset ti Barangay Bacsil iti nasao met laeng nga ili kalpasan a naiyanod daytoy.
Inbatad na a ginandat da nga I-revive ti ubing ken intaray da iti ospital ngem naideklara a pimmusayen daytoy.
Iti inisyal nga imbestigasyon dagiti otoridad, rumrumwar a nagregreg ti tsinelas ti ubing iti irigasyon ken idi alaen na daytoy ket ditoy a napasamak ti insidente.
Innayon pay ni Basallo a padigusen kuma dagiti nagannak ti biktima ti kabsat na a tallo a bulan a maladaga ken nagpakada met ti ubing a rumwar ngem saan da a ninamnama a napan iti irigasyon a saan unay nga adayo iti pagtaengan da.
