LAOAG CITY – Agtultuloy a maag-agasan ti agtawen ti uppat nga ubing a babai iti ospital idiay Sinait, Ilocos Sur kalpasan a nadungpar ti motorsiklo iti igid ti kalasda idiay Brgy Valbuena iti ili ti Pinili.
Nabigbig ti nangiturong ti motorsiklo a ni Marlon Abrogena Jr., agtawen ti 15 ken residente met laeng iti nasao a barangay.
Segun iti imbestigasyon ti PNP-Pinili, agtaktakder ti biktima ii igid ti kalsada partikular iti sangwanan ti balay da idi kellaat a nadungpar babaen ti motorsiklo.
Naamoan nga adda iti igid ti kalsada ti biktima gapo ta ur-urayen na ti ama na a ni Warner Pacariem y Oamil, agtawen ti 42 a mangirwar iti motorsiklo na manipud iti garahe ti balay da.
Inbatad ni Police Staff Sergeant Jay-ar Alcoy a basar iti ama ket kanayon a pagur-urayen da ti ubing iti igid ti kalsada ken saan met nga mapmapan iti tengnga ti kalsada ti anak na.
Gapo iti insidente ket nagsagaba ti biktima ti sugat iti ulo ken naitaray iti Pinili Municipal Health Unit ngem naiyakar iti Corpuz Clinic and Hospital idiay Sinait, Ilocos Sur.
