LAOAG CITY – Awan pay ti naestablisar ti PNP-Pinili a suspek iti pannakapalto-paltog a nakatayan ni Jason Rondal a taga Barangay Napu iti ili ti Badoc.
Segun kenni Police Senior Inspector Jepre Taccad, chief of police ti PNP-Pinili, manarimaan pay laeng ti naun-uneg nga imbestigasyon da seknan iti nasao a pammaltog.
Immunan nga inbatad ni Taccad nga addan dagiti anggulo a sursuruten da mainaig iti nasao a pasamak.
Nagkedked pay laeng ni Taccad nga ibusiklan dagiti motibo wenno anggulo a kitkitaen da iti pannakapapatay ni Rondal.
Nupay kasta, inpasingked ni Taccad nga iti sumaruno a lawas ket addan ton ti maipilaan ti kaso a mainaig iti daytoy.
Maipalagip a ni Rondal ket napaltogan iti paset ti Barangay Capandangan iti ili ti Pinili a puun ti nakatayan na.
Mainaig iti daytoy, kinumpirmaran ni Police Senior Inspector Joseph Tayaban, ti hepe ti PNP-Badoc nga awan ti rekord na iti pulisya malaksid laeng iti panagbalin na a drug surrenderer.
