LAOAG CITY – Dakkel a tulong dagiti kiniddaw ti gobierno probinsyal nga air asset wenno helibucket iti panangsebseb ti nagsina a grass fire iti probinsia.
Segun ken Mr. Vic Dabalos, ti mangidadaulo iti Provincial Environment and Natural Resources Office, insigida a nasebseban ti uram iti kabanbantayan a paset iti ili ti Nueva Era ken iti nagbedngan iti ili ti Solsona ken Dingras.
Daytoy ket gapu iti heli-bucket nga inpaay ti gobierno probinsial.
Inbatad ni Dabalos nga uppat a helibucket ti naipatulod ngem dua laeng ti nausar gapu ta kinabaelan na a sebseban ti grass fire.
Naamuan nga adda iti kalawa a 22 nga ektarya ti nauram iti ili ti Nueva Era idinto a 25 nga ektarya iti nagbedngan iti ili ti Dingras ken Solsona.
Kabayatanna, nagpalagip manen ti Provincial Environment and Natural Resources Officer a kasapulan ti disiplina dagiti tattao ken panunuten ti pannakaperdi ti aglawlaw gapu kadagiti uram a mapaspasamak.
