LAOAG CITY – Nagpila ni Akbayan Party-list Rep. Chel Diokno ti gakat a mangiyalud-od iti paternity leave dagiti ama manipod iti agdama a pito nga aldaw ket mapagbalin a 105 nga aldaw, kapada ti benepisyo a naipalaon iti maternity leave law.
Gagem ti House Bill No. 9891 wenno Paternity and Parental Leave Act (PAPA Leave Act) nga ipatungpal ti responsible a panagbalin a nagannak ken ipaayan ti gundaway dagiti amma a tumulong ken makipaset iti panangtaripato kadagiti annak kadagiti umuna a paset ti biagda.
Naipalaon iti gakat nga agbalin a 90 nga aldaw ti bayad iti paternity leave para iti live childbirth ken 60 nga aldaw met para iti miscarriage wenno emergency termination of pregnancy.
Adda met ti nayun a 15 nga aldaw a paid parental leave a mabalin nga usaren iti uneg ti maysa a tawen manipod iti panagpasngay, isut gapuna nga umabot iti 105 nga aldaw ti pakabuklan a benepisyo.
Sakopen pay ti gakat dagiti saan a nagkasar nga amma, dagiti alternatibo a agay-aywan, mangmangged iti informal economy, ken dagiti boluntaryo a miyembro ti Social Security System (SSS), basta mabaybayadan na ti kasapulan a kasapulan a kontribusyon.
Agtalinaed met nga ibaklay dagiti pribado nga employer ti umuna a bayad ti leave benefits, ngem ireimburse daytoy a buo ti Social Security System.
