LAOAG CITY – Nasakit ti nakem ni Mr. Vincent Domingo, residente ti Brgy. 7-B ditoy siudad ti Laoag ken ama ti ubing a lalaki nga agtawen iti uppat a natay kalpasan a maipagarup a saan a dagus a naipausar ti ambulansia ti Black Nazarene Hospital iti ili ti San Nicolas tapno maiyakar ti anakna iti Mariano Marcos Memorial Hospital and Medical Center iti siudad ti Batac.
Segun kenkuana, intarayda ti anakna iti nasao a pribado nga ospital kalpasan a nakatilmon ti kalob ti ballpen rason a dagus daytoy a naikabil iti Emergency Room.
Inbatadna a basar kadagiti doktor ket nagpukaw ti pitik ti puso ti anakna isu a kinasapulanda a tuboan agingga nga apagapaman a nakarekobre daytoy.
Inlawlawagna a kinasaritada isuna a masapol a maiyakar iti Mariano Marcos Memorial Hospital and Medical Center ti anakna ngem masapol nga agbayadda nga umuna ti lima a ribu a pisos para iti ambulansia.
Mainaig iti daytoy, kunana a kurang ti kuarta a naitugotda gapu ta dua a ribu a pisos laeng ti iggemda isu a saanda nga inasikaso isuda dagus.
Nupay kasta, inpalgakna nga apaman a nabukelda ti lima a ribu a pisos a dawdawaten ti ospital kadakuada para iti ambulansia ket insigida a nagtignay dagiti personnel ken staff ti ospital pakairamanan ti driver ti ambulansia.
Inlawlawagna a dagusda met nga inbaga iti pribado nga ospital a nakatilmon ti anakna ti kalob ti ballpen ngem inpettengda kadakuada nga awan ti nakasullat iti karabukob ti anakna banag a maisupadi iti nagbalin a resulta ti X-Ray iti ospital iti siudad ti Batac.
Mamati isuna a naisalbar koma ti biag ti anakna no dagus a naitaray ken naiyakar iti Mariano Marcos Memorial Hospital and Medical Center iti siudad ti Batac.
Innayonna a desididoda a mangipila ti reklamo kalpasan iti nakaladladingit a napasamak iti anakna.
