LAOAG CITY – Nakasaganan ni Senate President Francis “Chiz” Escudero a pirmaan ti arrest warrant kontra ken ni suspended Bamban, Tarlac Mayor Alice Guo.
Inbatad ni Escudero, pirmaanna ti arrest warrant no bilang kiddawen ni Sen. Risa Hontiveros, Chair ti Senate Committee on Women, Children, Family Relations and Gender Equality.
Ti komite ni Hontiveros ti agim-imbestigar iti maipagarup nga ilegal nga aktibidad ti Philippine Offshore Gaming Operators (POGO) a maminsan manen nga itultuloy ti hearing ita nga aldaw ti Mierkoles, Hulio 10.
Ni Guo, maysa a kangrunaan a resource person ket napaay a nagatendar iti naudi a panagdengngeg ken inpakaammo metten ti abugadona a saan a makaatendar ti Mayor iti hearing ita gapu iti trauma ken stress.
Inlawlawag ni Escudero a ti maysa a testigo ken masapol a mangipakita ti medical certificate a mangipaay ti umno a rason tapno saan nga agatendar iti maysa a panagdengngeg.
Innayonna a nakasagana ti Senado a mangipaay ti doktor tapno makita ti mental wenno pisikal a kasasaad ti maysa a testigo no awan ti pribado a doktor.
