LAOAG CITY – Natay ti asawa ti maysa a kameng ti Philippine National Police (PNP) iti ili ti Adams kalpasan a maipagarop a pinaltugan na ti bukod na a bagi.
Daytoy ti inbatad ni Police Capt. Eddie Valdez, ti chief of police iti ili ti Adams.
Segun ken ni Valdez, iti inisyal nga imbestigasyon da ket naduktalan ni Police Senior Master Sergeant Norman Sacro nga awan ti 9mm a service firearm na iti compartment ti motorsiklo na apaman a nakadanun iti kwerpo ti pulisya tapno agduty.
Gapu iti daytoy, nagsubli ni Sacro iti balayda ngem ditoy metten a maipagarop a nasangpetan na a nagpakamatay ti asawa na iti mismo a kama da babaen ti panangpaltog na iti ulo na partikular iti ngato ti lapayag a simmalpot iti ngatwen ti akin-kannigid a kiday-kiday na usar ti service firearm na.
Inpakaammo ni Valdez a sakbay iti insidente ket maipagarop a dinamag ti asawa ni Sacro no kasanu a malukatan ti compartment ti motorsiklo ti kadwa da a pulis.
Innayon na a mismo a ti anak ti biktima ti napan nagreport iti kwerpo ti pulisya mainaig iti maipagarop a panagpakamatay na.
Narekobre dagiti otoridad iti mismo a kama dagiti agasawa a Sacro ti maysa nga empty shell ti 9mm ken ti maibagbaga a nausar a paltog.
Agpapan ita ket awan pay ti naestablisar ti PNP a motibo ti maipagarop a panagpakamatay ti biktima.
Inpasingked ni Valdez nga agtultuloy ti panagimbestigar dagiti otoridad tapno maamoan no ania ti makaigapu a napanunot ti biktima ti maipagarop a nagpakamatay gapu ta basar iti inisyal nga imbestigasyon da ket awan met ti pagriririan dagiti asawa a Sacro.
