LAOAG CITY – Manarimaan ti pannakikoordinar dagiti law enforcement agencies ti Pilipinas kadagiti Vietnamese counterparts kalpasan a naireport a maipagrop a nakita idiay Vietnam ti pugante a negosyante ken kangrunaan a suspek iti kaso dagiti mapukpukaw a mammallot a ni Charlie Atong Ang.
Segun ken ni Department of Interior and Local Government Secretary Juanito Victor “Jonvic” Remulla, agar-aramiden kadagiti diplomatic efforts ti gobierno para iti pannakisarita da kadagiti otoridad ti Vietnam tapno makita ti immigration record ken masigurado no pudno nga adda iti nasao a pagilian ti maibilang a most wanted fugitive iti Pilipinas
Kuna na nga alisto laeng a maamoan ti resulta ken kumpirmasyon no adda idiay Vietnam ni Ang gapu iti pannaki-kokoordinar ni Philippine National Police (PNP) Chief PGen. Jose Melencio Nartatez Jr. kadagiti otoridad ti nasao a pagilian.
Kabayatanna, kitkitaen met ti possible a nakaruwar iti pagilian ni Ang iti babaen ti backdoor iti Mindanao agturong iti Malaysia sumagmamano a lawas kalpasan a rimuar ti warrant of arrests kontra kenkuana.
