LAOAG CITY – Inpakaammo ni Bombo International News Correspondent Greg Pasalodos manipud idiay United Kingdom nga awan ti aniaman a maiyuswat nga aktibidad wenno programa iti Buckingham Palace kagiddan ti pananglagip iti maikadua a tawen a death anniversary ni Queen Elizabeth.
Segun kenkuana, awan met dagiti impormasion a mangmangngegna ken mabuybuyana kadagiti media outlets idiay United Kingdom maipanggep iti nasao a banag.
Inbatadna a ni Queen Elizabeth ket makilablaban idi iti bone marrow cancer sakbay a natay no sadinno a ti ipapatay ti Reyna ket nangpabaro pay kadagiti diskusion maipapan ti masakbayan ti monarkia iti pagtaengan ken kadagiti nasion ti komunidad.
Inlawlawagna a dimmanon iti sangapulo nga aldaw iti pannakiladingit iti intero a pagilian.
Mainaig iti daytoy, kuna ni Mr. Pasalodos ti gagem iti panagserbi ti Reyna kas maysa nga agtutubo iti World War II ket nagaramid kadagiti radio broadcsting tapno mapapigsa ti moral ti publiko ti Britania.
Malaksid iti dakkel a panagrang-ay ti literatura, adda pay dadduma a rason a maibilang a nabalitokan a panawen ti panawen ti panagturay ni Queen Elizabeth.
Napateg ti ginasut a linteg maipapan iti panaglayag, komersio, industria, reporma iti kuarta, kalsada, panangtulong kadagiti napanglaw ken agrikultura.
Kabayatanna, naammoan a nagtakem ni Queen Elizabeth iti las-ud ti 70 a tawen ken 214 nga aldaw a maibilang nga isu ti kabayagan ti maysa a soberano nga estado iti pakasaritaan.
