LAOAG CITY – Inbatad ni Mayor Homer Domingo iti ili ti Adams a 24/7 a nakamonitor da iti intero nga ili iti iduduprak ti bagyo Nando.
Kuna na a kadagitoy a gundaway ket awanen ti supply ti kuryente da isut gapuna a generator ti us-usaren dan.
Inpakaammo na a narigat payen ti signal iti internet wenno linya iti komunikasyon.
Innayon na nga iti agdama ket marikna dan ti epekto ti Bagyo Nando aglalo ket nakabayug iti ili ti signal number 4.
Mainaig iti daytoy, kuna ni Mayor Domingo a dagiti residente nga agnanaed iti asideg ti karayan ket naikabil da aminen kadagiti evacuation center.
Inrakurak pay ti mayor a saandan a palubusan dagiti residente a rumuar iti pagtaengan da gapu ta napigsan ti tudo ken angin no sadinno nga adda payen dagiti natumba a kayo.
