LAOAG CITY – Agtultuloy ti manhunt operation dagiti kameng ti PNP-Piddig iti lalaki a nangbako-bagkong a nakasugatan ti live-in-partner na iti Barangay 2, Anao iti nasao nga ili.
Segun kenni Police Captain Christopher King Ramos, ti chief of police ti PNP-Piddig, idi laeng rabii ket adda ti naipadanon kadakuada a report seknan iti panagbagkong isut gapo na a dagus da a nagturong iti lugar.
Kunana nga idi nakadanon da iti nakapasamakan ti krimen ket awanen ti suspek idinto a ti biktima ket naitaray metten iti Mariano Marcos Memorial Hospital and Medical Center iti ciudad ti Batac.
Inbatad na nga iti panagimbestigar da ket rumrumwar nga agim-imon ti suspek iti saan pay a mabigbig a lalaki a nangitunda ti panagriri da iti biktima.
Inlawlawag na a naalaan da metten ti palawag ti ina ti suspek ken kabsat ti biktima mainaig iti nasao a pammagkong.
Naamoan a basar met iti palawag ti biktima ket saan na nga ammo no siasinno ti lalaki a pagim-imonan ti suspek, ken napasamak ti pammagkong iti mismo a salas ti pagtaengan da usar ti kutsilyo.
Innayon na a nadiskubre da pay a masansan ti panagap-apa dagiti aglive in partner.
Mainaig iti dayto, kuna ni Ramos nga iti nakalap da nga impormasyon ket naggapo iti rehab ti suspek.
Kabayatanna, immapela met ni Ramos ti tulong iti publiko para iti al-alisto a pannakatiliw ti suspek.
