LAOAG CITY – Maysa a bag maker company a nakabase idiay Tokyo, Japan ti nagaramid ti randoseru wenno backpack para laeng kadagiti taraken nga aso.
Ti randoseru ket maysa a klase ti backpack nga us-usaren dagiti elementary students idiay Japan. Ti randoseru ket naaramid iti natibker a materyal kas ti leather ken dinisenio tapno agpaut ti innem a tawen a panagadal iti elementaria.
Daytoy ket masansan nga addaan ti a disenio ken tradision a mabalin nga iregalo kadagiti agtawen iti innem nga ubbing sakbay a sumrekda iti umuna a tukad ti elementaria.
Daytoy a tradision ket nangrugi pay idi Edo period ken agpapan ita ket simbolo pay laeng ti panangrugi ti panagadal dagiti ubbing idiay Japan. Gapu ta masansan a makita kadagiti anime ken Japanese dramas, nagbalin a fashion item daytoy iti western culture.
Gapu ta nagbalin nga uso daytoy kadagiti adult western foreigners, napanunutan ti bag maker company a Tsuchiya Kaban a nagaramid metten para kadagiti aso. Inruarda daytoy a produkto idi Oktubre 2023 ken napagsasaritaan daytoy kalpasan nga in-post ti sikat a baseball player a ni Shohei Ohtani ti tarakenna nga aso a nakasuot iti daytoy.
Iti baet ti kinangina ti randoseru nga agbalor ti 49,500 yen wenno katukad ti 17,980 pesos, naruay ti gimmatang iti daytoy ken na-sold out dagus iti napalas a tawen. Basar iti Tsuchiya Kaban, ag-release-da manen ita nga Hulio.
