LAOAG CITY – Adu ti maam-amak a motorista iti panagdalyasatda iti kalsada iti sangoanan ti pagtaengan ti maysa a baket nga agnagan ti Pity a residente ti Brgy. Bulbulala iti ili ti Vintar.
Segun ken ni Brgy. Kagawad Vilmar Ibana iti nasao a barangay, daytoy ket kalpasan nga adda ti maysa a motorista a maysa a Barangay Treasurer ti pinalapal ti kayo ti maseknan a baket kabayatan ti panangiturongna iti motorsiklona.
Inbatadna a nabayagen a kastoy ti ar-aramiden ti baket kadagiti dumaldalyasat iti nadakamat a kalsada gapu ta napaspas ken natagari dagitoy.
Nupay kasta, kinontra ni Brgy. Kagawad Ibana ti ar-aramiden ti baket gapu ta delikado ken makadangran kadagiti motorista a mabalin a mangitunda ti pannakadesgrasia dagitoy.
Inpalgakna nga adda pay dagiti nakapenpen a kaykayo iti sango ti pagtaenganda nga isu ti usarenna nga ipalapal kadagiti dumalyasat a motorista gapu ta maipagarup a naringgor dagitoy.
Kunana a mamati a ti namunganayan daytoy nga ar-aramidenna kadagiti motorista ket kalpasan a saan a napatgan ti kiddawna kadakuada a barangay officials a maikkan ti humps iti kalsada a batog iti pagtaenganda banag a daytoy ket maipawilen.
Mainaig iti daytoy, inpakaammo ni Brgy. Kagawad Ibana a nakisaritada iti Department of the Interior and Local Government maipapan iti daytoy a mapaspasamak iti barangayda nga umad-adu dagiti maap-apektaran iti aramid ti maseknan a baket no sadino naammoanda a karbenganda nga opisial a mangipila ti kaso kontra iti baket.
Inlawlawagna a saanna a masinunuo no adda ti problema ti panagpanpanunot ti baket gapu ta nasayaat met daytoy no dadduma.
Kiniddawna ti naan-anay a panangrespetar kadakuada nga opisial gapu kadagiti ipadpadanonna nga impormasion kadagiti dadduma a tattao nga awan ti serserbida a nabutosan iti barangay.
Innayonna a maluksaw ti riknana ken makalua pay iti ar-aramiden a panangibabain ti baket kadakuada nga opisial ti barangay.
Kabayatanna, naammoan nga agmaymaysa laeng nga agnanaed ti maseknan a baket iti pagtaenganda gapu ta adda met ti kabagianna ngem saanda nga agtitinnunos dagitoy.
