LAOAG CITY – Inpeksa ti Bangko Sentral ng Pilipinas (BSP) ti panangsuportada iti desision ti sumagmamano a bangko a kissayan wenno ikkaten ti singir iti interbank digital transactions.
Gagem daytoy nga addang nga aramiden a nalaklaka ken al-alisto para kadagiti Pilipino ti panagusar ti electronic fund transfers.
Ti nasao a desision ket sungbat iti Bangko Sentral ng Pilipinas Circular No. 1238 a naiparuk-at iti napalabas a bulan a mangibilbilin kadagiti bangko nga ibaba ti transfer fees ken agbalin a nakasagana iti panangipaay ti cost analysis no kasapulan.
Inbatad ni Bangko Sentral ng Pilipinas Governor Eli M. Remolona, Jr. ti nababbaba a transaction costs ket makatulong iti al-alisto a pannakaitandudo ti digital payments ken panangpapigsa ti pakabuklan a sistema ti panagbayad.
