LAOAG CITY – Naragsak nga inpakaammo ni Mrs. Marilou Pasalo, ti School Principal I iti Bingao National High School iti ili ti San Nicolas a ti baro a dua a kadsaaran iti pagadalanda ket mausar kas maysa kadagiti temporario a pagtarusan dagiti makipaset iti Region 1 Athletic Association.
Segun kenkuana, dumanon iti nasurok maysa a milyon a pisos ti pundo a nausar iti pannakaipasdek ti nasao a pasilidad iti pagadalan.
Inlawlawagna a saan a dagus a naileppas ti pannakaipasdek ti pasilidad gapu ta naitantan gubuay iti COVID-19 pandemic.
Inbatadna a nasayaat gapu ta naikamakam ti pannakaileppas ti pannakaaramid ti baro a pasilidad nangruna ket adda dagiti atleta ken coach manipod idiay Alaminos City, Pangasinan ti mangusar iti nasao a pasilidad.
Kunana a ti pannakaipasdek ti baro a 2 storey building ket para kadagiti Supreme Student’s Government Officers, Guidance Office ken School Parents Teachers Association Conference.
Innayonna a daytoy ket proyekto ti Parents Teachers Association iti nasao a pagadalan ket pakairamanan ti tulong aggapu ti Local Government Unit iti San Nicolas nga indauloan ni Honorable Angel Miguel L. Hernando.
