LAOAG CITY – Naipaiman iti Philippine National Police iti ili ti Marcos ti baro a Municipal Police Station kalpasan ti naiyuswat nga inauguration, turnover ken signing of deed acceptance.
Segun ken ni Police Capt. Roi Manuel Ordunio, ti chief of police iti ili ti Marcos, karaman kadagiti nagatendar iti pannakaipaiman kadakuada ti baro a municipal police station ket ti regional director ti Philippine National Police a ni Police Brigadier General Lou Evangelista kenni Provincial Director Police Col Frederick Obar.
Nagserbi met kas naisangsangayan a bisita ti Presidente ken Chief Executive Officer ti Armed Forces and Police Savings and Loans Association, Incorporated a ni Rear Admiral Nicholas Driz.
Inlawlawag ni Ordunio a ti lote a nakaipatakderan ti baro a municipal police station iti Barangay Lydia ket indonar ti munisipyo iti ili ti Marcos.
Kabayatanna, inbatad ni Ordunio a saan da pay a maakuparan ti baro municipal police station gapu ta manarimaan paylaeng ti pannakaiproseso ti pannakaikonektar ti linya ti kuryente manipud iti Ilocos Norte Electric Cooperative.
