LAOAG CITY – Binabalaw ni Labor leader Ka Leody de Guzman ti Wage Order No. 28 nga imparuk-at ti Wage Board, a mangipatpatungpal ti P60 wage increase para kadagiti mangmangged a Pilipino iti Metro Manila.
Kwinestionaranna ti baro a pammilin gapu ta saan a nairamaan ditoy ti kanayunan a P25 manipud iti immunnan a Wage Order No. 27, a naikeddeng para iti pakabukelan nga P85 a kanayunan a sueldo a nagudua iti dua a tranche.
Maipalagip a temporario a naitantan ti pannakaipatungpal ti wage increase iti Metro Manila gapu iti injunction order nga inparuk-at ti Pasig Regional Trial Court.
Mainaig iti daytoy, inbatad ni Department of Labor and Employment Secretary Francis Tolentino iti nagbalin a deliberasion ti rakurak a pondo ti ahensia iti kongreso nga awan ti kapasidadda nga isubli ti naitantan a pannakaipangato ti sueldo gaputa segun kenkuana, adda iti korte suprema ti maudi a desision maipapan kadaytoy a linteg.
Kabayatanna, inpetteng ni Ka Leody a ti aksion ti gobierno ket para laeng mawayawayaan ti kapristo dagiti kapitalista a pagtalinaeden a nababa ti sueldo dagiti mangmangged a saanda a kalikagum ti sumurot iti nasao a wage order.
