LAOAG CITY – Natay ti maysa a baro kalpasan a maipagarup a pinaltogan ti bukudna nga ama iti Brgy. 22, San Guillermo iti ili ti San Nicolas.
Basar iti pannakisarsarita ti Bombo Radyo Laoag News Team ken ni Jefer John Cabbat, kabsat ti biktima, napan inanawa ti biktima a ni Jovanie Cabbat, agtawen ti 25 ti amana a nabartek a ni Fermin Cabbat, agtawen ti 57 gapu ta pupuoranna dagiti kagamitan ti inana.
Segun kenkuana, apaman a naanawa ti kabsatna ti amada ket dagus daytoy a nagturong iti kuartona.
Nupay kasta, inpalgakna a saanna nga inpagarup a napan nangala ti amana ti armalite ket ditoy a kellaat a pinaltoganna ti biktima ti namindua a daras.
Gapu iti daytoy, kunana a dagus a naitaray iti kaasitgan nga ospital ti kabsatna ngem naideklara a dead on arrival.
Inlawlawagna a masansan nga agin-inom ti amana ken arig saanna ammo ti ar-aramidenna gapu iti napalaos a kinabartekna.
Innayonna a saanna pulos a mapakawan ti amana gapu iti inaramidna iti kabsatna.
Kabayatanna, basar iti ama ti biktima ket nasakit ti nakemna gapu ta kanayon a rabii wenno parbangonen no sumangpet ti anakna iti pagtaenganda.
Naiget met a naglikudan ti suspek nga ama ti biktima a pinaltoganna ti bukudna nga anak.
Insigida a natiliw ti suspek babaen kadagiti napan nagresponde nga otoridad.
Naammoan a retirado a Philippine Army ti ama ti biktima a nagretiro idi 2010 ken rumrummuar a managimon daytoy.
Iti agdama, agtultuloy pay laeng ti iwaywayat a naun-uneg nga imbestigasion dagiti otoridad maipanggep iti napasamak a pammaltog.
