LAOAG CITY – Inrakurak ti Philippine Health Insurance Corporation (PhilHealth) nga inpangaton ti ahensia ti benefit package para kadagiti pasiente ti cataract surgery ken lens implant iti P80,900 para iti adult ken P187,100 met para iti pediatric patient a mangrugi ita a katapusan ti bulan ti Enero iti agdama a tawen.
Inbatad ni President Emmanuel Ledesma Jr., manipud iti P16,000 idi 2014 ket ngimmato daytoy ti 405.6 percent para kadagiti adult patient ken pakabuklan a 1,069.4 percent a pasiente nga ubbing.
Inlawlawag ti ahensia a ti reimbursable ammount ket nakadepende iti klase ti lens implant.
Iti maysa a mata para iti adult cataract extraction surgery ket dumanonen iti P20,200.
Para met iti package ti cataract surgery nga addaan ti monofocal intraocular lens (IOL) ket dumanon iti P28,300 ken P48,300 para met iti monofocal toric ti intraocular lens.
No met ti ipaaramid ket cataract extraction nga addaan ti multifocal insertion ti intraocular lens ket dumanon iti P66,900 ken P80,900 para iti multifocal toric insertion ti intraocular lens.
