LAOAG CITY – Inrakurak ni Fire Supt. Roxanne Parado, ti firemarshall iti Ilocos Norte nga ad-adda pay a pinaigetan da ti isaysayangkat da nga information dissemination tapno maliklikan ti grassfire wenno forestfire ditoy probinsya.
Nagpanawagan ni Parado iti publiko kangrunaan na dagiti agan-anop, agala ti uyukan ken dagiti agur-uring a masapol nga agbalin a responsable tapno maliklikan ti pannakauram dagiti kabanbantayan.
Inpakaammo ni Parado nga iti napalabas a bolan ket nakipaset da iti Province Barangay Assembly nga inatendaran dagiti nagduduma a barangay iti intero a probinsya tapno ipakaammo dagiti rumbeng nga aramiden dagiti maseknan.
Mainaig iti daytoy, kuna ti opisyal a manpower, ti kangrunaan a kasapulan iti pananglaban da kontra kadagiti mapaspasamak nga uram iti kabanbantayan.
Innayon na a no maipapan kadagiti usaren da a kagamitan ket nakasagana, aglalo ket adda dagiti sumagmamano a lokal a gobierno ditoy probinsya a gimmatang kadagiti bukod da a gamit a mausar no bilang adda ti mapasamak nga uram iti bukod da a lugar.
Kuna na pay nga adda met ti inyalokar a pondo ti gobierno probinsyal para iti magatang nga air blower nga alisto a makasebseb iti apoy no adda ti mapasamak a grassfire.
Iti agdama, inpanakkel ni Parado a napintas ti koordinasyon, kooperasyon ken kolaborasyon dagiti maseknan nga ahensya ti gobierno tapno maipababa ti bilang dagiti nairekord nga uram ditoy probinsya iti napalabas a tawen.
Kabayatanna, kinumpirmaran ni Parado nga ita a bolan ket addan ti dua a nairekord da a forest fire iti ili ti Carasi ken Vintar, ngem alisto laeng a nasebseban gapu ta adda ti nakasagana a team da.
