LAOAG CITY – Maragsakan ni Engr. Shiela Opelac, ti mangidadaulo ti City Agriculture Office ditoy ciudad ti Laoag gapu ta imadon dagiti mannalon nga agmulmula iti tabako.
Segun kenni Engr. Opelac, umaboten iti 20 nga ektaria iti kataltalunan ti namulaan ti tabako ditoy ciudad ti Laoag.
Kunana a napintas daytoy a damag gapu ta isu pay a nayun iti pagbiagan dagiti mannalon.
Innayon na nga addan ti 20 a barangay dagiti agmulmula ti tabako ditoy ciudad, pakairamanan iti Barangay Bacsil North ken South, Dibua North ken South, Lataag, Bengcag, Zamboanga, San Lorenzo ken dadduma pay.
Mainaig iti daytoy, inpakaammo ni Opelac nga ipapaay ti gobierno lokal dagiti kasapulan dagiti mannalon para iti panagmula da ti tabako kas ti abono, pestidio , makina a pagpadanum, ken dadduma pay.
Kabayatanna, kuna ni Opelac nga ikamkampanya da ti panagmula ti tabako gapu ta makita da iti napintas a produksyon ditoy cuidad ti Laoag.
Maipalagip a manarimaan ti pannakaipasdek ti Laoag City Tobacco Livelihood Training Center iti Brgy. 54-B Camangaan ditoy ciudad ti Laoag.
