LAOAG CITY – Manayonan ti tao nga agbantay kadagiti quarry site ditoy probinsia tapno masigurado nga awan mapasamak nga illegal nga aktibidad.
Daytoy ti inpasingked ni Mr. Victor Dabalos, mangidadaulo ti Department of Environment and Natural Resources – Provincial Environment and Natural Resources Office.
Segun kenkuana, bumasbassiten ti bilang dagiti aglablabsing iti illegal quarrying ditoy probinsia banag a napintas daytoy para kadagiti umili.
Inbatadna a basar iti datosda ket nababbaba nga amang dagiti matiltiliwan nga agsalsalungasing kadagiti pagannurutan iti panangiwayat ti panag-quarry wenno panagkutkot no idasig itay napan a tawen.
Kabayatanna, inlawlawag ni Dabalos a napintas no maikkan met ti insentibo dagiti mangtiliw kadagiti aglabsing iti paglintegan tapno adda ti gunggunada.
