LAOAG CITY – Manmano paylaeng dagiti turista a napan bimmisita iti ili ti Pagudpud ita a semana santa.
Daytoy ti inbatad ni Mr. Hendrick Pedronan, ti mangidadaulo iti Municipal Disaster Risk Reduction and Management Office iti ili ti Pagudpud.
Segun ken ni Pedronan, arigna awan pay ti 20 a porsiento dagiti turista a nagturong iti ili ti Pagudpud ita a semana santa no ikompara ti bilang dagiti nagturong iti isu metlaeng a panawen idi 2025.
Kuna na a kaadoan kadagiti nagturong iti ili ti Pagudpud ken dagiti metlaeng residente kadagiti kaabay da nga ili.
Inpasigurado met ni Pedronan nga adda dagiti lifeguards kadagiti kabaybayan nga inwaras ti lokal a gobierno ti nasao nga ili tapno masigurado ti kinatalged ken adda ti agbantay kadagiti mapa agdidigus.
Innayon na nga iti panangiyuswat da ti “Oplan Summer Vacation” ket katulungan da ti nagduduma nga ahensya ti gobierno kas ti Philippine National Police, Bureau of Fire Protection, Philippine Coastguard, Philippine Marines, ken dagiti Medical Health Responders manipod iti Rural Health Unit, a dagitoy ket maiwaras iti nagduduma a lugar iti nasao nga ili.
