LAOAG CITY – Inpakaammu ti Philippine National Police a dakkel ti panagbaba dagiti nairekord a krimen ditoy pagilian iti napalabas a maysa a tawen.
Iti panagbitla ti hepe ti Philippine National Police a ni Police General Rommel Marbil iti seremonia a naangay para iti maika-123 nga anibersario ti Police Service iti Camp Crame idiay Quezon City, kinuna ti hepe a bimmaba iti 14,666 ti bilang dagiti krimen ditoy pagilian manipud Hulio 2023 agingga iti Hunio 2024 .
Kinunana a dakkel ti panagbaba ti rape cases, carnapping, robbery, pakairamanan ti 21.09% a panagbaba ti cybercrime incidents a mangipakpakita laeng nga epektibo ti kapasidad ken panagtitinnulong dagiti kamemg ti pulisya.
Malaksid iti daytoy, inpannakkel met ni PGen. Marbil ti pakabulan a P36.5 billion a balor ti illegal drugs a nakumpiskar manipud Hulio 1, 2022 agingga Hulio 31, 2024, pakairamanan ti kadakkelan a drug haul iti pakasaritaan ken ti kangatuan a nairekord a pannakakumpiskar ti illegal a droga idiay Alitagtag, Batangas a P9.68 billion a gatad ti shabu idi Abril 2024.
Gapu iti daytoy, inpetteng ti hepe ti Philippine National Police nga agtalinaedda a naiget iti panangpreserba iti biag ti tao iti sidong ti “less-bloody” drug war ti administrasion ni Marcos.
Maipalagip nga iti sidong ti agdama nga administrasion, naituloy ti kampania kontra iti illegal a droga ngem iti sabali a wagas a “less bloody” a nairugi iti panangidaulo ni dati a hepe ti PNP retired general Rodolfo Azurin Jr. nga intuloy dagiti simmaruno kenkuana.
