LAOAG CITY – Mamati ti Bureau of Internal Revenue a madanonda ti bilyon a pisos ti surplus revenue collection ti ahensia para iti tawen 2024.
Inbatad ni Bureau of Internal Revenue Commissioner Romeo Lumagui, mangnamnama ti ahensia a maaddaan ti binilyon a surplus iti koleksion daytoy para iti napalabas a tawen.
Daytoy ket kalpasan ti pannakaisayangkat ti final reconciliation ken ti resulta daytoy ket naikeddeng a mairuar iti umuna a lawas ti Pebrero ita a 2025.
Inlawlawag ni Lumagui, ti binilyon a surplus iti revenue collection-da ket mangipasimudaag laeng a basbassit ti utang a kasapulan a kolektaren ti gobierno tapno mapagtalinaed ti budget ita a tawen.
Kunana a maibilang daytoy a balligi para kadagiti Pilipino ken dagiti sumaruno pay nga henerasion gapu ta matawidda ti basbassit nga utang ti gobierno.
Immunan nga inrakurak ni Commissioner Lumagui ti sumurok P2.848 a trilyon a collection goal a naartapanen ti Bureau of Internal Revenue.
