LAOAG CITY – Nakumpirmaran nga agpapan ita ket saan pay a naikkat ti piring wenno blindfold ti monumento ni Anastacia Giron Tupas, founder ti Philippine Nurse Association iti mismo a sangwanan ti City Health Office ditoy ciudad ti Laoag.
Segun kenni Mrs. Mariecris Ancheta, nurse supervisor ti nasao nga opisina, ti pannaka-piring ti monumento ket paset ti panagprotesta dagiti nurse nga agpapaay iti pribado a sektor.
Daytoy ket gapo ta kalikagom dagiti maseknan nga agpada ti entry level salary iti gobierno ken pribado a sektor.
Naamoan nga iti agdama ket Salary Grade 15 wenno nasurok 19 a ribo a pisos agdependar no anya a LGU wenno ospital ti pagtrabahoan na.
Inbatad na a ti nasao a protesta ket pakairamanan pay ti pannaka-regular wenno pannakapermanente dagiti nurses kadagiti ospital, rational a bilang ti nurses a mangtaming kadagiti pasyente, shift wenno oras ti panagtrabaho da ken positibo a work environment kadagiti amin nga health facilities ditoy pagilyan.
Naamoan nga ita laeng nga aldaw a nadlaw ni Ancheta ti saan pay a pannaka-ikkat ti piring iti monumento ni Tupas.
