LAOAG CITY – Ballaigi a nakaidonar ti dara dagiti 152 nga indibidual bayat ti naiyuswat a blood letting activity iti Ilocos Norte Police Provincial Office nga initiatibo ni Presidential Assistant for Northern Luzon Assistant Secretary Ana Carmella Ventura Remigio kas paset ti maika-51 a panagkasangayna.
Daytoy ti maika-tallo a tawen a pannakaissayangkat ti nasao nga aktibidad iti tunggal panagkasangayna gapu ta kalikagomna a matulungan dagiti umili nga agkasapulan ti dara.
Mainaig iti daytoy, ti nasao nga aktibidad ket nagmalmalem a naisayangkat iti Multi-Purpose Hall iti nasao a lugar.
Nakibinnulog ni Assistant Secretary Remigio iti Ilocos Norte Police Provincial Office ken iti Philippine Red Cross ditoy probinsia.
Kabayatanna, nakipagaset dagiti kameng ti Philippine National Police, Philippine Marines, Philippine Navy, Philippine Army, Bureau of Fire Protection, nagduduma a motorcycle group, Samahang Ilocano ken dadduma pay a grupo.
