LAOAG CITY – Kinurihir ni Sangguniang Panlalawigan Member Donald Nicolas, Chairman ti Committee on Games and Amusement ti pannakai-refer iti ordinansa mainaig iti pannakaaprobar ti renewal ti permit iti cockpit arena iti ili ti Dingras iti Committee on Laws kas lead committee.
Segun kenkuana, basar iti internal rules kangrunaanna iti paset a mainaig iti komite ket nakailanad no ania dagiti sakupen ti Committee on Games and Amusement.
Inbatadna a ti komitena ket sakupna ti panangtratar iti operasion dagiti arena, coliseum, cockpit, movie house, theaters, disco houses ken dadduma pay nga amusement facilities.
Gapu iti daytoy, kalikagum ti Chairman ti Committee on Games and Amusement a mai-refer ti ordinansa iti komitena.
Inlawlawagna a tapno maaramid daytoy ket masapul nga aprobaran ti Sangguniang Panlalawigan sakbay a maipasa ti minutes ti napalabas a sesyon.
Kabayatanna, immanamong ti Presiding Officer ken dagiti kameng ti Sangguniang Panlalawigan.
