LAOAG CITY – Kalikagum ni Sangguniang Panlalawigan Member Jonathan Torralba, Chairman ti Committee on Agriculture a mabakunaan dagiti taraken a baboy a sumrek ditoy probinsia kontra iti African Swine Fever wenno ASF virus.
Segun kenkuana, babaen iti daytoy ket maipasigurado a saan a makastrek ti virus ditoy probinsia banag nga isu ti naiget nga isaysayangkatda iti agdama.
Inbatadna a kanayon ti pannakikoordinarda kadagiti maseknan nga agbanbantay kadagiti border control ditoy probinsia tapno agtalinaed nga ASF free ditoy probinsia.
Mainaig iti daytoy, inpakaammo ti Chairman ti Committee on Agriculture nga adda ti immun-unan a pannakisarsaritana ken ni P/Col. Frederick Obar, Provincial Director ti Ilocos Norte Police Provincial Office a tulunganda ti Provincial Veterenary Office tapno makitada ti rumuar ken sumrek ditoy probinsia.
Innayonna nga adda dagiti sumagmamano a lugan a saan nga agsardeng no saan a pulis ti mangsada kadakuada.
Kabayatanna, naammoan a malaksid iti ili ti Badoc ket naiget pay a banbantayan dagiti otoridad iti ili ti Solsona, Nueva Era ken Pagudpud.
