LAOAG CITY – Inbatad ni Bombo International News Correspondent Denmark Suede iti Australia nga inrakurak ni Prime Minister Scott Morisson a lukatan dan ti border da intono Pebrero 21 ita a tawen.
Nupay kasta, agtalinaed a nakaserra ti border iti Western Australia gapu ta saan a kayat ti State government a malukatan agingga a saan a magun-od ti lugar ti 80% booster coverage.
Inpakaammo ni Suede a no malukatan ton ti border iti Australia malaksid iti Western Australia ket mabalin ton a sumrek dagiti turista sadinno man a pagilyan ti paggapwan da.
Innayon na nga adda laeng ti pagalagadan a nasken a suruten dagiti turista no sadinno a masapol nga apaman a makastrek da iti nasao a pagilyan ket dumalan da ti rapid antigen test.
Kabayatan ti panangur-uray dagiti maseknan ti resulta ti rapid antigen test ket agtalinaed da iti pagtarusan da a balay no sadinno nga uray negatibo ti resulta ket saanda paylaeng a mabalin ti rumuar gapu ta kalpasan ti innem nga aldaw ket kasapulan a dumalan da manen iti sabali a test.
Inlawlawag na a no negatibo manen ti resulta ti rapid antigen test dagiti turista ket mabalin danton ti rumuar tapno agpasyar iti nasao a pagilyan.
