LAOAG CITY – Maiyuswat ti budget hearing ti Ilocos Norte para iti tawen 2025 inton sumaruno a bulan.
Segun ken ni Sangguniang Panlalawigan Member Donald Nicolas, Chairman ti Committee on Appropriations, naikeddeng iti uppat nga aldaw ti pannakaisayangkat ti budget deliberations kadagiti nagduduma a pangopisinaan ti gobierno probinsial.
Inbatadna a maiyuswat ti budget hearing inton Nobiembre 19 agingga 22 tapno matratar a naimbag dagiti nailungalong a pundo iti tunggal opisina ken matingiting a nasayaat ti pakaibanagan dagiti programa ken proyekto.
Inlawlawagna a karaman kadagiti matratar a pundo ket ti Office of the Governor nga aggatad ti 2,711,836,177.81.
Innayonna nga idauloan ti Local Finance Committee ti pannakaisayangkat ti budget hearing a bukbuklen ti Provincial Treasure’s Office, Provincial Planning and Development Office ken Provincial Accounting Office.
Kabayatanna, mangnamnama ti Chairman ti Committee on Appropriations ti hunta probinsial nga agbalin a naannayas ti pannakatingiting ti pundo ti probinsia para iti tawen 2025 kas kadagiti naglabas a tawen.
